પલ તરત છું હસ્તગત છું દોસ્ત,
સ્કંધ દઉં એવી સિફત છું દોસ્ત.
કોઈપણ ખૂણે મને વાંચી લે,
એટલું વ્યાપ્ત જગત છું દોસ્ત.
કાલની નિશ્ચિત સવારો રાખી,
સાંજ આથમતી અક્ષત છું દોસ્ત.
શોધ મારી જ્યારે પડતી મૂકે,
સાવ પડખે છું વખત છું દોસ્ત.
હાજરીથી શું વિશેષે હોય !
પણ વિકલ્પે દસ્તખત છું દોસ્ત.
‘કીર્તિ’ આખર ઓગળે મક્તામાં,
હું જ મારી કેફિયત છું દોસ્ત !
…..કીર્તિકાન્ત પુરોહિત
ગીત એક ગાયું અને વાયરે વાવ્યું
કે છોડ એનો છુટ્ટો મેલ્યો રે લોલ !
પંખી એક આવ્યું ને આભ એવું ફાવ્યું
કે ટહુકો ઉકેલિયો રે લોલ !
ફૂલ એક ફૂટ્યું ને લોચનિયે ચૂંટ્યું
કે પાંદડી એવી ને એવી રે લોલ !
છલકીને છાઈ રહે, વાયરે વેરાઈ રહે
મીઠી અદીઠ ગંધ સહેવી રે લોલ !
સરવરને તીર સર્યા, સરવરને નીર તર્યા
અમે કોરા ને છાંયડી ભીની રે લોલ !
તરુવરના તારલા ને આભલાના પાંદડાં
બેઉની વાત એક વીણી રે લોલ !
…..પ્રિયકાન્ત મણિયાર
અષાઢી આંખમાં મૃગજળ જણાયાં છે,
અધિકતર માણસો, વાદળ જણાયાં છે !
દિવસની જેમ ખુલ્લેઆમ જોયું તો,
ઘણાં નક્કર તમસ, પોકળ જણાયાં છે !
અપેક્ષા કેમ રાખું સ્થિરતા જેવી ?
અહીં પ્રત્યેક મન, ચંચળ જણાયાં છે !
ફરી ગઈ છે ઘણી વ્યાખ્યા, સમય સાથે
ઘણાં સ્થાપિત રહસ્યો, છળ જણાયાં છે !
નથી કરતાં સ્વયં સ્વીકૃત બળીને, પણ
મને એ સીંદરીમાં વળ જણાયા છે !
કસોટી કોણ કરશે અર્ધસત્યોની ?
સ્વયં ઈશ્વર, મને વિહવળ જણાયા છે !!
…..ડૉ. મહેશ રાવલ
અમારો ચાલુ રહ્યો પ્રવાસ !
ગણ્યા વિસામા જેને એ તો હતો માત્ર આભાસ !
રણ જેવા આ મનમાં
લીલા વન શાં તમને સાથે લીધા,
તમે પાઓ છો તેથી તો
મેં છતે જાણતે મૃગજળ પીધાં.
હવા કાનમાં કહી ગઈ કે ફૂલમાં ક્યાં છે વાસ ?
અમારો ચાલુ રહ્યો પ્રવાસ.
જે પગલાંમાં કેડી દેખી
દૂર દૂરની મજલ પલાણી;
પાછા વળનારાની પણ છે
એ જ નિશાની, આખર જાણી !
હવે થાકના ટેકે ડગલાં ભરી રહ્યો વિશ્વાસ !
અમારો ચાલુ રહ્યો પ્રવાસ !
…..રઘુવીર ચૌધરી
રામના પગથી પ્રભાવિત રહેવાનું,
ને અહલ્યા જેમ શાપિત રહેવાનું.
આપણે છોને સિકંદર હોઈએ,
જાતથી કાયમ પરાજિત રહેવાનું.
શૂળના ગુણધર્મની એને ખબર,
ફૂલ તો કાયમ સુવાસિત રહેવાનું.
કેટલું દુષ્કર છે કોઈ શું જાણે ?
સૂર્યની માફક પ્રકાશિત રહેવાનું.
લાગશે ‘નાદાન’ બહુ વસમું દિલને
આપણા ઘરમાં જ ત્રાહિત રહેવાનું
…..દિનેશ ડૉંગરે ‘નાદાન’
નાનું-મોટું કોઈ એવું પદ નથી,
આપણા સામર્થ્યને કોઈ હદ નથી.
સહેજ પણ આળસ તને ના પરવડે,
દોસ્ત, પયગંબર છે તું, કાસદ નથી.
સઘળે પહોંચે છે વિચારો આપણા,
સારું છે, એને કોઈ સરહદ નથી.
એટલી પણ વ્યસ્તતા શા કામની,
જીવવાની પણ અગર ફુરસદ નથી.
સાચું કહું તો તારા પ્રત્યે જિન્દગી,
હા મને પ્રેમ છે પણ… અનહદ નથી.
…..કિરણ ચૌહાણ
સીધું યા પરભારું હોવું જોઈએ,
દર્દનું સરનામું હોવું જોઈએ.
લોકને બસ હોય નિસ્બત એટલી,
તારું અથવા મારું હોવું જોઈએ.
માવજત માટે હશે રસ્તા ઘણા,
પણ દુવાનું ય બારું હોવું જોઈએ.
મોતની અલબત સફર છે એકલી,
જીવવું સહિયારું હોવું જોઈએ.
રૂપ, કૌશલ ને ગુણો ઓછા પડે,
‘કીર્તિ’, ગજવે નાણું હોવું જોઈએ.
…..કીર્તિકાન્ત પુરોહિત
કીર્તિકાન્તભાઈની એક યાદગાર ગઝલ !
તેમની આ ગઝલમાં જિન્દગીની વિડંબનાઓ અને તત્વજ્ઞાનનો
હળવો સ્પર્શ જોવા મળે છે. જીવનમાં દવા સાથે દુવાની પણ
એટલી જ જરૂર છે. અનંતની સફરે તો એકલા જ જવાનું છે પરંતુ
જીવન તો એકબીજાના સાથ-સહકારથી જ જીવાશે. જીવવા માટે
રૂપ, કૌશલ ને ગુણો, હશે તેટલા ઓછા પડશે જો ગજવે નાણા
પૂરતા નહીં હોય તો !
હું તો તારી તે પ્રીતમાં પાગલ થઇ ગઇ,
હું તો ધરતીની ધૂળ જાણે વાદળ થઇ ગઇ,
હું તો તારી તે પ્રીતમાં પાગલ થઇ ગઇ.
હું તો કંઇ પણ નથી ને મને ફૂલ ફૂટ્યાં,
હું તો બ્હાવરી : મેં તારા કંઇ ગીત ઘૂંટ્યાં ;
તારી સાથેની મારી પળપળની વાત,
મારી કોરી આંખોનું કાજળ થઇ ગઇ ;
હું તો તારી તે પ્રીતમાં પાગલ થઇ ગઇ.
હું તો આંખો મીંચીને ગીત સાંભળ્યા કરું,
મારી છાની આ લાગણી પંપાળ્યા કરું ;
કેવાં આ લાભશુભ : ઓચિંતા એક દિવસ,
હું તો કંકોતરીનો કાગળ થઇ ગઇ ;
હું તો તારી તે પ્રીતમાં પાગલ થઇ ગઇ.
……પન્ના નાયક
પગલાંની ધારોધાર બીજું કૈંક છે,
કેવળ નથી આકાર બીજું કૈંક છે !
નજરોનજર દેખાય છે અનહદ છતાં,
એ હદની પેલેપાર બીજું કૈંક છે !
કોઈ નામ દઈને- જિન્દગી જીવ્યા કરે,
કોઈના મતે સંસાર બીજું કૈંક છે !
કોણે ઉકેલ્યા છે રહસ્યો મૌનના,
એથી ય અપરંપાર બીજું કૈંક છે !
ઘટતા જવાની વાત રાખો બાજુએ,
તો શ્વાસ હારોહાર બીજું કૈંક છે !
મારા હિસાબો શેષથી સંલગ્ન છે,
ત્યાં શૂન્ય ભારોભાર બીજું કૈંક છે !
…..ડૉ. મહેશ રાવલ
વૈભવ મળ્યો છે એટલો કે કશાની ખોટ નથી,
લાગણીનો છલકે દરિયો ક્યાંયેય ઓટ નથી.
સાજન, સખા-મિત્રોની દુવા છે કંઈ કેટલીય,
સંબંધોની આસપાસ કોઈ દિવાલ કે કોટ નથી.
અહમના પહાડના થતા રહે છે ચૂરા-ચૂરા,
અધ્યાત્મના સ્પર્શ જેવી બીજી કોઈ ચોટ નથી.
સમયસર જીવનમાં સુપેરે સઘળું થતું રહે,
હરિફાઈમાં ઉતરવા મૂકી ક્યારેય દોટ નથી.
‘ગુરુબાબા’એ આપેલો એક સેવામંત્ર છે કે
‘બીજાનું ભલું’ જેવી કોઈ કરન્સી નોટ નથી.
પ્રગતિ માટે સદા પરિશ્રમ કરવો જ રહ્યો,
નસીબ બદલે એવો કોઈ ઘંટીનો લોટ નથી.
જીવનમાં ચર્ચા-વિચારણાને અવકાશ છે જ,
પણ ‘દિલ કોઈનું દુઃખે’ એમાં મારો વોટ નથી.
મારી નુકશાની માટેનો તમારો જ પ્લાન હશે,
તમારી ચાલાકી ન સમજું એવો હું ભોટ નથી.
…..રેણુકા વશી
