શ્વાસની પેલી તરફ ઉચ્છવાસની પેલી તરફ,
દ્રષ્ટિ ખોડાઈ ગઈ વિશ્વાસની પેલી તરફ.
દર્પણોનાં પોપચાં ઊઘડે અને બીડાય ત્યાં,
એક પડછાયો ફરે આભાસની પેલી તરફ.
આ તરફ તો શહેરનાં ખંડેર ખડકાયે જતાં,
કૂચ કરતા સૈનિકો ઇતિહાસની પેલી તરફ.
હાથતાળી દૈ સતત સરકી જતા પળવારમાં,
શબ્દને શોધ્યા કરું હું પ્રાસની પેલી તરફ.
કોઈ સોનેરી કિરણ ફેલાય બિસ્મિલ આરપાર,
હર્ષની પેલી તરફ ઉલ્લાસની પેલી તરફ.
-બિસ્મિલ મન્સૂરી
