તેથી જ લાગે છે

બધું દેખાય છે સરખું ફરક તેથી જ લાગે છે,
સકલ બ્રહ્માંડ છે ભેગું અલગ તેથી જ લાગે છે.

અહીં સૌ ભેટવા માટે કણસતાં હોય છે કાયમ ,
મળે છે રોજ રસ્તા પર ફડક તેથી જ લાગે છે.

મને અજવાસના અર્થો નથી એકે’ય આવડતાં,
તમસ ઘેરી વળે કાયમ ચમક તેથી જ લાગે છે.

છલોછલ ચૂપ બેઠો છું પરિચય એ જ છે મારો ,
નથી એમાં કશું અઘરું સરળ તેથી જ લાગે છે.

નથી ફફડાટ ઝીલતો,નથી પાંખો ય પરખાતી ,
ગગન દેખાય એનાથી ગહન તેથી જ લાગે છે.

– વારિજ લુહાર