હાથ ધોવા છે

કહે છે શ્વાસ જેને એ હવાથી હાથ ધોવા છે,
તરસને ત્યાગવી છે, ઝાંઝવાથી હાથ ધોવા છે.

મને મારા તબીબે છેતર્યો છે જિંદગી આખી,
નથી માફક જે આવી એ દવાથી હાથ ધોવા છે.

બધા મંગળ-અમંગળ કોઇ લઇ ચાલ્યું ગયું છે તો,
હવે આ લાભ-શુભ ને શ્રી-સવાથી હાથ ધોવા છે.

હતા ઝળઝળિયા જૂના ત્યાં નવા નક્કોર આંસુ છે,
જૂનાથી ધોઇ છે આંખો , નવાથી હાથ ધોવા છે.

બધી રીતે જુઓ ગજ આપણો ટૂંકો પડ્યો ‘આતુર’,
હવે આ માપવા ને પામવાથી હાથ ધોવા છે.

– બાબુલાલ ચાવડા ‘આતુર’