આજ મારા ગામને દેજો વરસાદ
આકુળ ને વ્યાકુળ છે દિવસ ને રાત
આજ મારા ગામને દેજો વરસાદ…
કોઈ કહે આજ આવે કોઈ કહે કાલ
અહીં તો કોરી ગઈ સાલોની સાલ
આજ તો જોશીડા વરતારા નાખ
આજ મારા ગામને દેજો વરસાદ…
ના ખાવાને ધાન ના પીવાને પાણી
આવી છે હર કોઈ ઘરની કહાણી,
તાજી ના મળશે અહીં ચૂલામાં રાખ
આજ મારા ગામને દેજો વરસાદ…
ડમરીઓ ધૂળની ને ઊની ઊની લાય
આકરો છે તડકો ને નેજવાની છાંય
મૂંગા તરુવર કરશે કોને ફરિયાદ
આજ મારા ગામને દેજો વરસાદ…
રસ્તા સૂમસામ ને સૂની છે કેડીઓ
ખાલી પરસાળ ને ખાલી છે મેડીઓ
તૂટ્યા છે તાર ને ખૂટ્યા સંવાદ
આજ મારા ગામને દેજો વરસાદ…
એટલું તો કહો તમે માનશો ક્યારે
જીવન અમને પાછું આપશો ક્યારે
આજે તો નાખી દો ઝાપટું એકાદ
આજ મારા ગામને દેજો વરસાદ…
– પ્રવીણ શાહ
Very nice
કોઈ કહે આજ આવે કોઈ કહે કાલ
અહીં તો કોરી ગઈ સાલોની સાલ
આજ તો જોશીડા વરતારા નાખ
આજ મારા ગામને દેજો વરસાદ…
વાહ નખશિખ સુંદર
kavita 50 varas paachhi gai
અલ્લા પાની દે, મેઘ દે, પાની દે….
ગરમીથી ત્રાસેલો માનવી વરસાદ સમય પાર કરી જાય તો વરસાદને મનાવે છે. આ ગીતમાં એ જ વાત છે, ગામના માટે સમસ્તી માટે મેઘને અરજ કરવી. સરસ ગીત.
મજાનું વરસાદી અવસાદનું ગીત…. !!
ટૂંકી બહેરની પ્રથા ગીતમાં પણ જાળવી રાખી છે…
દરેક બંધ અસરકારક નીવડ્યા છે… અભિનંદન પ્રવીણભાઈ… !!
સરસ.
abhar mitro…