… હોય તો

સાવ એકાકીપણું, એકાંત નરવું હોય તો,
કોઈ રીતે બસ તમારે ધ્યાન ધરવું હોય તો.

દૂર લગ સંભળાય પડઘા મૌન શ્વાસોના પછી,
એક અનહદ નાદનું જો નામ સ્મરવું હોય તો.

સ્તબ્ધ હો ઈચ્છા અને જો મૂક પીડા ખળભળે,
તે સમે સંતોષથી જો મનને ભરવું હોય તો.

આમ તો કહેવાય છે ધસમસ પ્રવાહ ગંગાનો પણ,
જોઈએ વિશ્વાસ જો સામે ઉતરવું હોય તો.

બે ઘડી બેસી શકો ‘આનંદ’ને સાથે લઈ,
થઈ સુગંધી ચોતરફ તારે પ્રસરવું હોય તો.

– અશોક જાની ‘આનંદ’

Advertisements

દ્રશ્ય છે

આંખમાં અંકાઈ ગયેલું દ્રશ્ય છે,
કે પછી ઉંઘવા ન દેતું સ્વપ્ન છે.

જે ત્વચા છેદીને ભીતર જઈ શકે,
આંગળીમાં કોની એવો સ્પર્શ છે..!?

હું સતત લખતો રહું લખતો રહું,
એમ લાગે આદર્યો કોઈ યજ્ઞ છે.

ના હવે કોઈ ફરક પડતો નથી,
ખળભળી ઉઠે ક્યાં એવું રક્ત છે.!?

જો તમે ઢંઢોળશો તો નહીં ઉઠે,
ઉંઘમાં ‘આનંદ’ એવો વ્યસ્ત છે.

– અશોક જાની ‘આનંદ’

સપનાં નવાં છે

રાતો નવી, નીંદર નવી, સપનાં નવાં છે,
મારે ફકત આ દુર્વિચારો ખાળવાં છે.

કેવું સહજ છે સુખ અને દુ:ખ તોલવાનું ..!!
આપેલ મનમાં ઈશ્વરે આ ત્રાજવાં છે.

તોફાન છે નૌકા ફસાઈ છે વમળમાં,
ઈશ્વર છે મોટો કે પછી બે ખારવા છે.

જીવી જવા આ જિંદગી જીવવું પડે છે,
અવસાદના ધાડાં બધાં આ ટાળવાં છે.

સંબંધને આંખો મીંચી માની લઉં શેં.!?
સંવેદનાની લઈને પટ્ટી માપવાં છે.

દોડી રહ્યો છું જેની પાછળ હું અવિરત,
નક્કી કરો એ લક્ષ્ય છે કે ઝાંઝવાં છે.

પીડા હવે નિતરી ગઈ ‘આનંદ’માંથી,
સંતોષ ને સ્વીકાર, સાથે બાંધવા છે.

– અશોક જાની ‘આનંદ’

ખાલી ખાલી છે

 

હાથ બંને આ ખાલી ખાલી છે,
ફક્ત મનની જાહોજલાલી છે.

એક ડગલું ભરું છું એમાં તો,
એણે બે પાંચ ચાલ ચાલી છે.

કેવા સંજોગ !! જોઈ લો મિત્રો,
હાથે નહીં, બસ આ ગાલે તાલી છે.

કોઈ જીવન ભરી લે મસ્તીથી,
કોઈને કાયમી હમાલી છે.

જે હંમેશા પૂછે છે પ્રશ્નો બસ,
દિલ ભીતર કોઈ તો સવાલી છે.

હું કરું યાદ કે ભૂલી જાઉં,
બેઉ રીતે આ પાયમાલી છે.

સાથ શબ્દોનો લઈને ક્યાં લગ જઉં
કલ્પના ખુદ જ્યાં નમાલી છે..!!

નામ રાખ્યું છે આમ ‘આનંદ’ મેં,
મન છતાં થઈ ગયું રૂદાલી છે.

– અશોક જાની ‘આનંદ’

તું મને ના પૂછ કંઈ

તેં પૂછેલા પ્રશ્ન વિષે તું મને ના પૂછ કંઈ,
ને સુઝેલા શબ્દ વિષે તું મને ના પૂછ કંઈ.

કોઈ એક દળદાર પુસ્તક-પાન પર પથરાઈ ને,
દૂરના એ દ્રશ્ય વિષે તું મને ના પૂછ કંઈ.

આમ તો આળોટતી રહે છે સફળતા પગ મહીં,
પણ કરેલા યત્ન વિષે તું મને ના પૂછ કંઈ.

સૌની માફક મેં હંમેશા કેટલી મહેનત કરી,
રાહ આવ્યા વિઘ્ન વિષે તું મને ના પૂછ કંઈ.

મેં સમિધો કેટલી ‘આનંદ’ની સ્વાહા કરી,
ને પ્રગટતા યજ્ઞ વિષે તું મને ના પૂછ કંઈ.

– અશોક જાની ‘આનંદ’

કંઈ પરખાયું નહીં

અમારી આંખની ભાષામાં કંઈ પરખાયું નહીં,
કહી દીધું છતાં પણ એમને સમજાયું નહીં.

અમે વીણતા રહ્યાં પળના જુઓ કંઈ ઝુમખાં,
સમય કહે છે કે મારાથી કંઈ વેરાયું નહીં.

ઘણી વાતો અમે કરતાં રહ્યાં’તા મૌન રહી,
છતાં પણ એમને થોડું ઘણું સંભળાયું નહી.

ઘણા ઈંગિત સંકેતો વિખેર્યા રાહમાં,
ખબર નહીં કેમ એને હાથ કંઈ પકડાયું નહીં.

અમે પણ હાથ સંજોગોના કઠપૂતળી હતા,
પછી ‘આનંદ’ સાથે કોઈ પણ અથડાયું નહીં.

અશોક જાની ‘આનંદ’

શ્વાસ છું

હા, હવે તુટી ચુક્યો છું..શ્વાસ છું,
હું જીવું કે જીવવાનો ભાસ છું..!?

કોઈ શા કારણ કરે મુજ ખરખરો,
સાવ સસ્તો આમ છું, ક્યાં ખાસ છું?

એક પણ ફદિયું મળે તો ખુશ થઉં,
સાવ પડતર હું નકામું ઘાસ છું.

મિત્રોની છે પહોંચ ક્યાંની ક્યાં સુધી,
હું તો નાની વ્હેંત જેવો વ્યાસ છું.

સ્હેજ સ્પર્શે ત્યાં સતત ખુંચતી રહે,
દે કદી ‘આનંદ’ ના એ ફાંસ છું.

– અશોક જાની ‘આનંદ’